Ibice byinshi by’Uburayi byibasiwe n’ubukonje bukabije bwateje urubura rwinshi, bituma ubuzima bwa buri munsi buhagarara mu Bufaransa, u Bwongereza n’u Buholandi. Imihanda yuzuye urubura, gari za moshi zirahagarara, indege zisubika ingendo, mu gihe abaturage bagumye mu ngo zabo bategereje ko ibihe bihinduka.
Kuwa 5 Mutarama, ikigo cy’u Bufaransa gishinzwe iteganyagihe cyatanze umuburo ukomeye ku batuye mu Burengerazuba n’Amajyaruguru y’igihugu, harimo n’Umujyi wa Paris, gitangaza ko bagomba kwitondera ubukonje bukabije bushobora guteza urubura rukomeye.
Uwo muburo ntiwatinze kwigaragaza mu buzima busanzwe, kuko amasaha make yakurikiyeho, imihanda myinshi yatangiye kugorana kunyurwamo.
Mu Bwongereza, u Bufaransa n’u Buholandi, ingendo zo ku butaka no mu kirere zahise zisubikwa. Sosiyete ya Eurostar itwara abagenzi muri gari ya moshi ihuza u Bwongereza n’ibindi bihugu by’i Burayi yasabye abari bafite ingendo hagati ya Londres n’u Buholandi kuzisubika.
Ku murongo wa Londres Paris, gari za moshi esheshatu zagombaga guhaguruka kuri sitasiyo ya St Pancras International zerekeza Paris Gare du Nord zasubitswe burundu, mu gihe izindi zagize ubukererwe bukabije.
Umugenzi wari utegereje gari ya moshi i Londres yagize ati: “Twari twiteguye kugenda kare, ariko tubwirwa ko ingendo zasubitswe. Biragoye, ariko umutekano uruta byose.”
Inzego zishinzwe imihanda ya gari ya moshi mu Bwongereza zahise zohereza amakipe yihariye n’ibikoresho byo kuvana urubura mu mihanda, nyuma y’uko rugaragaye rugeze kuri santimetero 52 mu bice bimwe na bimwe. Uwo murimo wakozwe mu bihe bigoye, kuko ubushyuhe bwakomeje kugabanuka.
Kuva ku Cyumweru, mu Bwongereza hagiye humvikana ubukonje bukabije cyane, aho ubushyuhe bwageze kuri degere celsius 10,9 munsi ya zeru ndetse abahanga mu by’ikirere batangaza ko kuwa Kabiri buri bugere kuri degere celsius 12 munsi ya zeru. Ibi byatumye inzego z’ubuyobozi zisaba abaturage kugabanya ingendo zitari ngombwa.
Ingaruka z’ubwo bukonje ntizagarukiye ku ngendo gusa. Muri Ireland y’Amajyaruguru, amashuri 212 yafunze imiryango yayo kuwa 5 Mutarama, kubera imihanda yari yanamye n’impungenge z’umutekano w’abanyeshuri n’abarimu.
Umuyobozi w’ishuri rimwe yagize ati: “Twahisemo gufunga kuko byari bigoye ko abana bagera ku ishuri mu mutekano usesuye.”
Mu rwego rw’ingendo zo mu kirere, ibibuga by’indege bimwe byabaye bihagaritse imirimo by’agateganyo, birimo John Lennon Airport i Liverpool, Aberdeen, Belfast na Derry.
Nubwo bimwe muri byo byaje kongera gufungura nyuma, abagenzi benshi bagumye bagaragaza impungenge n’umunaniro w’igihe kirekire bamaze bategereje.
Abashinzwe iteganyagihe batangaje ko nubwo hari icyizere ko ubukonje buzagenda bugabanuka mu minsi ikurikira, abaturage bagomba gukomeza kwitwararika, cyane cyane mu ngendo zo ku mihanda no mu kirere.
Ibi bihe byongeye kwibutsa Abanyaburayi uko imihindagurikire y’ibihe ishobora guhindura ubuzima mu kanya gato, igasaba kwitegura no gufata ingamba zihamye zo kwirinda ingaruka zayo.
INKURU YA TUYISHIME Eric
