Mu gihe isi ihanganye n’ibyaha byifashisha ikoranabuhanga, u Rwanda ruri mu nzira yo gushimangira ubufatanye mpuzamahanga bugamije kurinda umutekano w’abaturage barwo.
Ibi byagarutsweho na Minisitiri w’Umutekano mu Gihugu, Dr. Vincent Biruta, unayoboye umuryango “Eastern Africa Police Chiefs Cooperation Organization (EAPCCO)”, mu nama yahuje abayobozi b’inzego za Polisi baturutse mu bihugu bya Afurika y’Iburasirazuba n’u Bushinwa, yabereye i Kigali tariki 5 Ugushyingo 2025.
Iyi nama yitabiriwe n’abayobozi bakuru b’inzego z’umutekano, igamije gutsura imikoranire mu kurwanya ibyaha by’ikoranabuhanga, iterabwoba n’ibyaha byambukiranya imipaka. Yasojwe hasinywa amasezerano y’ubufatanye hagati ya Polisi y’u Rwanda n’iy’u Bushinwa, yashyizweho umukono na Minisitiri Dr. Biruta na mugenzi we w’u Bushinwa, Xu Datong.
Dr. Biruta yashimye ubushake bw’u Bushinwa mu kongera ubushobozi bw’inzego zishinzwe umutekano muri Afurika y’Iburasirazuba, agaragaza ko ubufatanye nk’ubu bugamije kurinda abaturage, guteza imbere ibikorwa remezo no kubaka amahoro arambye.
Ati: “Ibibazo by’umutekano biragenda bihindura isura. Ubufatanye hagati ya EAPCCO n’u Bushinwa ni ingenzi mu gusangira amakuru, ubumenyi no kubaka ubushobozi bwo guhangana n’iterabwoba n’ibyaha by’ikoranabuhanga.”
Umunyamabanga wa Leta wungirije mu Bushinwa, Xu Datong, yavuze ko u Bushinwa buzakomeza kuba umufatanyabikorwa w’akarere mu iterambere ry’umutekano, by’umwihariko mu kuzamura ubumenyi bwa Polisi no kubafasha kubona ibikoresho bigezweho.
Ati: “Turashaka ubufatanye butajegajega bushingiye ku bwubahane n’inyungu rusange, kugira ngo duhangane n’ibyaha byambukiranya imipaka n’ikoranabuhanga ritera ibibazo ku mutekano mpuzamahanga.”
Mu byemejwe muri iyi nama, harimo ko u Bushinwa buzajya butanga inkunga y’ibikoresho bya Polisi bifite agaciro ka $137,000 (asaga miliyoni 176 Frw) kuri buri gihugu cyagize uruhare muri EAPCCO. Bwanemeye kandi gutanga amahugurwa ku bantu 400 bo muri aka karere no gushyigikira umukandida wa EAPCCO ku buyobozi bwa INTERPOL.
Kuva ubufatanye bw’uyu muryango n’u Bushinwa bwatangira umwaka ushize, hamaze gutegurwa imyitozo 18 yabereye mu Bushinwa, igahuriramo abapolisi bagera kuri 347, naho 7 bahabwa buruse zo kwigira mu rwego rwo kongera ubumenyi mu gucunga umutekano.
Inzobere mu mutekano zigaragaza ko ubu bufatanye bushobora guhindura byinshi mu kurwanya ibyaha by’ikoranabuhanga n’ibyaha byambukiranya imipaka, byagiye byiyongera mu karere k’Afurika y’Iburasirazuba mu myaka ishize.
Ubufatanye nk’ubu bukaba buha amahirwe ibihugu byo mu karere kuba bifite imbaraga zihuriweho mu kurinda abaturage no gusigasira amahoro arambye.
INKURU YA TUYISHIME Eric
