Nyuma y’itangazwa ry’ibyavuye mu matora y’Umukuru w’Igihugu yabaye ku itariki ya 28 Ukuboza 2025, imijyi myinshi ya Santrafurika yaranzwe n’amarangamutima atandukanye. Mu gihe bamwe bishimiraga intsinzi ya Faustin-Archange Touadéra, abandi bagaragazaga impungenge n’ubwumvikane buke ku mibare yatangajwe n’inzego z’amatora.
Komisiyo y’Igihugu ishinzwe Amatora (ANE) yatangaje by’agateganyo ko Perezida Touadéra yegukanye amajwi 76.15%, umubare wahise ugaragazwa nk’uwerekana icyizere gikomeye cy’abatoye. Nyuma ye hakurikiye Anicet-Georges Dologuele wagize amajwi 14.66%, mu gihe Henri-Marie Dondra yagize amajwi 3.19%. Ariko aba bahanganye bombi bahise batangaza ko batanyuzwe n’uko amatora yakozwe n’uko amajwi yabazwe.
Umwe mu bakurikiranye ibikorwa by’itora mu majyepfo ya Bangui yagize ati: “Hari abaturage benshi bitabiriye, ariko hari n’abavuga ko batabonye uko bagira uruhare rwuzuye mu matora. Ibyatangajwe byatunguye abantu bamwe.”
Nubwo ibisubizo byatangajwe by’agateganyo, biteganyijwe ko Urukiko rushinzwe Itegeko Nshinga ari rwo ruzatanga ijambo rya nyuma bitarenze tariki ya 20 Mutarama 2026. Nibyo bizagena niba Touadéra azatangira ku mugaragaro manda ye nshya, izaba iya gatatu ayoboye iki gihugu.
Touadéra, ufite imyaka 68, azwi nk’umuyobozi wanyuze mu bihe bikomeye by’amateka ya Santrafurika. Yinjiye bwa mbere ku butegetsi mu 2016, nyuma yo kuba Minisitiri w’Intebe mu myaka yari yaranzwe n’ubwumvikane buke bwa politiki. Mu 2020, yongeye gutorerwa manda ya kabiri, amatora yabaye mu gihe igihugu cyari kigeramiwe n’imitwe yitwaje intwaro yari yegereye umurwa mukuru.
Mu 2023, impinduka zakozwe ku Itegeko Nshinga zahinduye byinshi mu miyoborere y’igihugu. Izo mpinduka zakuyeho imipaka ya manda z’Umukuru w’Igihugu, zinongera igihe cya manda kigera ku myaka irindwi.
Ababishyigikiye bavuze ko byari bigamije gutanga umwanya uhagije wo kubaka igihugu cyari kimaze igihe mu makimbirane, mu gihe ababyamaganye babibonye nk’intambwe ishobora guhungabanya ihame rya demokarasi.
Mu matora ya 2025, ANE yatangaje ko abatora bagera kuri 52.42% bitabiriye, umubare abasesenguzi bamwe bavuga ko ugaragaza inyota y’abaturage yo kugira uruhare mu guhitamo ubuyobozi bwabo, nubwo hakiri icyuho mu cyizere cy’inzego z’amatora.
Ku mihanda ya Bangui, bamwe mu bashyigikiye Touadéra bagaragazaga ibyishimo. Umusore wari wambaye umupira w’ishyaka riri ku butegetsi yagize ati: “Twabonye amahoro ugereranyije n’ibihe byashize. Ni yo mpamvu twamuhaye andi mahirwe.”
Ariko ku rundi ruhande, hari abavuga ko intsinzi ye ikwiye gusuzumwa byimbitse. Umuyobozi wa rimwe mu mashyirahamwe riharanira uburenganzira bwa muntu yavuze ati: “Icy’ingenzi si uwatsinze gusa, ni uko buri muturage yumva ko ijwi rye ryumviswe.”
Mu gihe hategerejwe icyemezo cya burundu cy’Urukiko rushinzwe Itegeko Nshinga, Santrafurika ihagaze mu masangano y’icyizere n’impungenge. Abaturage bategereje kureba niba iyi ntsinzi izaba intangiriro y’ituze rirambye n’iterambere, cyangwa niba impaka za politiki zizongera gushyira igihugu mu kaga.
INKURU YA KAYITESI Ange
