Impeshyi ya 2025 izasiga amateka atazibagirana ku batuye ndetse n’abasura Intara y’Iburengerazuba, binyuze muri Kivu Beach Expo & Festival, iserukiramuco rikomeye rizazenguruka uturere dutanu dukora ku nkengero z’Ikiyaga cya Kivu. Ni igikorwa cy’ubukerarugendo n’imurikabikorwa kizahuza ubusabane, umuco, ubucuruzi n’imyidagaduro guhera ku wa 3 Nyakanga kugeza ku wa 31 Kanama 2025.
Iri serukiramuco ryateguwe na Yirunga Ltd ku bufatanye n’Intara y’Iburengerazuba hamwe n’urugaga rw’abikorera. Rizatangirira i Rubavu ku mucanga wa Public Beach tariki ya 3 Nyakanga 2025 dore ko bizaba ari no mu bihe byiza by’ikiruhuko yaba ku banyeshuri ndetse n’abakozi, rikomereze i Rutsiro, Karongi, Rusizi, risorezwe i Nyamasheke.
Abazitabira bazahabonera byinshi byiza…
Kivu Beach Festival 2025 ni ikirori cyateguwe ku nshuro ya 2 mu rwego rwo gutuma impeshyi iba umwanya wo kwidagadura no guteza imbere ubukungu.
Rizaba ririmo:
Imikino yo ku mucanga nka beach volleyball, koga no gusiganwa mu mazi.
Imurikabikorwa ryo kumenyekanisha ibyo u Rwanda rukora (Made in Rwanda) nk’ubukorikori, ibiribwa, imyambaro n’ibindi.
Ibirori n’umuziki aho abahanzi bazaturuka mu Rwanda no muri Repubulika Iharanira Demokarasi ya Congo (DRC) bazasusurutsa abantu mu ndirimbo zigezweho n’iz’umuco gakondo.
Amarushanwa y’impano agenewe urubyiruko, hagamijwe kuzamura n’abahanzi bakizamuka.
Umuyobozi wa Yirunga Ltd, Yves Iyaremye avuga ko iyi festival izaba itandukanye n’iyabaye mu mwaka wa 2024 kuko ubu izagera mu turere twose dukora ku kiyaga. Ati: “Iyi festival izerekana isura nshya y’Intara y’Iburengerazuba. Ni urubuga rwo guhuriza hamwe ubukerarugendo, impano, umuco n’iterambere.”
Umuco n’ubukungu biganisha ku ishoramari niyo ntego
Uretse kwidagadura, iri serukiramuco rifite intego yo guteza imbere ubukerarugendo bushingiye ku mazi n’umuco, no gukangurira abashoramari gushora imari mu bice bikikije Ikiyaga cya Kivu. U Rwanda rwihaye intego yo kongera amahirwe y’ishoramari n’ibikorwa byunguka bikomoka ku buranga karemano bwacyo.
Habiyaremye Constant, Umuyobozi wa Koperative KIAKA ikorera i Rubavu, avuga ko bazitabira bagaragaza ibikoresho by’ubukorikori bakora, nk’intebe, imitako n’imipira y’amaboko.
Ati: “Ntituzaza tugamije gucuruza gusa, ahubwo tuzagaragaza ubushobozi bwacu, umutekano w’akarere kacu n’icyizere mu bukorikori n’ubukerarugendo.”
Kivu Beach Festival 2025 yitezweho kuzamura imibereho y’abaturage, by’umwihariko abacuruzi, abanyabukorikori n’urubyiruko. Hazabaho ubucuruzi bunyuranye, amahirwe yo kumenyekanisha ibikorwa ndetse n’amasoko mashya ku bikorerwa imbere mu gihugu.
Festival izajya itangira saa tatu za mu gitondo kugeza saa yine z’ijoro, buri munsi muri turiya turere twatangajwe hejuru. Hazaba hari amarushanwa, imyidagaduro n’imurikabikorwa, byose bigamije gufasha abantu kwishima, kuruhuka no kwiga ibishya.
Kivu Beach Festival 2025 ni umwanya mwiza wo kongera gukundisha abanyarwanda n’abanyamahanga uburanga bw’Ikiyaga cya Kivu. Ni ibihe byiza ku bakunda kuruhuka ku mucanga, kubaho mu bihe byiza byo kwinezeza amateka ndetse no kwidagadura mu mico itandukanye.
INKURU YA NIKUZE NKUSI Diane
