Nyuma y’imyaka 5 isi ihanganye n’icyorezo cya COVID-19, aho urukingo rwacyo rwagize uruhare runini mu kurinda ubuzima bwa benshi, ubu haravugwa akamaro gashya nk’icyizere mu buvuzi. Ubushakashatsi bushya bwagaragaje ko uru rukingo rushobora kugira uruhare mu gufasha mu kuvura kanseri, binyuze mu gukangura ubwirinzi bw’umubiri kugira ngo bumenye uturemangingo twanduye kanseri tuboneke hakiri kare.
Ubu bushakashatsi bwakozwe ku bufatanye bwa Kaminuza ya Florida n’Ikigo cya Texas MD Anderson Cancer Center, bwakorewe ku barwayi barenga 1.000 bafite ubwoko butandukanye bwa kanseri, burimo kanseri y’ibihaha n’iy’uruhu zikunze kuba zigoye kuvura.
Abarwayi 43 ba kanseri y’uruhu bahawe urukingo rwa COVID-19 mbere yo gutangira imiti, byagaragaye ko babashije kubaho igihe kirekire ugereranyije n’abandi 167 batigeze baruhabwa.
Ku barwayi ba kanseri y’ibihaha yo ku rwego rwo hejuru, igihe cyo kubaho cyiyongereye hafi inshuro ebyiri, kiva ku mezi 20 kigera ku mezi 37. Abashakashatsi basanze uru rukingo ruteza imbere imbaraga z’ubwirinzi bw’umubiri, rukarufasha kumenya vuba uturemangingo twa kanseri no kutwibasira mbere y’uko twiyongera.
Dr. Elias Sayour, inzobere mu buvuzi bw’abana bafite kanseri akaba n’umuyobozi w’ubu bushakashatsi ku ruhande rwa Kaminuza ya Florida, yasobanuye ko uru rukingo rutagize gusa uruhare mu kurinda icyorezo cya COVID-19, ahubwo rugaragaza ubushobozi bushya mu gukangura ubwirinzi bw’umubiri.
Yagize ati: “Ubu bushakashatsi bwerekanye ko urukingo rutagabanya gusa ibyago byo kwandura COVID-19, ahubwo rufasha ubwirinzi bw’umubiri bumenye uturemangingo twa kanseri hakiri kare.”
Dr. Adam Grippin, inzobere mu kuvura kanseri muri MD Anderson Cancer Center, yavuze ko ibisubizo byabonetse byari bitunguranye ariko biteye icyizere.
Ati: “Abarwayi bahawe urukingo rwa COVID-19 rwubakiye ku ikoranabuhanga rya mRNA mu minsi 100 mbere yo gutangira ubuvuzi, bagaragaje amahirwe menshi yo kubaho. Ibisubizo byerekanye ko uru rukingo rushobora kuba rufungura ubwirinzi bw’umubiri bwari buryamye, rukarwongerera imbaraga zo kurwanya kanseri.”
Abashakashatsi bavuga ko impamvu nyamukuru ituma uru rukingo rugira izi ngaruka nziza ari uko rutekereza ubwirinzi bw’umubiri nk’aho rugiye kurwana n’indwara nshya, bityo rukarwibutsa uburyo bwo kumenya no kurwanya uturemangingo twanduye.
Mu igerageza ryakorewe ku mbeba zagaragaweho kanseri, abashakashatsi baziteye urukingo rwa COVID-19 mu gace kirimo indwara, basanga rukangura utunyangingo tw’ubwirinzi, rugatuma twohereza ubutumwa bukurura izindi ngabo z’umubiri zizwi nka T cells kugira ngo zirwanye kanseri.
Nubwo ibyavuye mu bushakashatsi bitarafatwa nk’imiti isimbura ubuvuzi busanzwe bwa kanseri, abahanga bavuga ko ari intambwe ikomeye mu kumenya uburyo bwo gukoresha ikoranabuhanga rya mRNA mu kuvura izindi ndwara zikomeye.
Dr. Sayour yagize ati: “Si buri muntu cyangwa inyamaswa izagira ibisubizo bimwe, kuko si buri T cell ishobora kwica kanseri. Ariko urukingo rufasha ubwirinzi bw’umubiri kumenya vuba ibibazo bikiri mu ntangiriro, bikagabanya ubukana bwa kanseri.”
Ubushakashatsi bwakozwe muri Kaminuza ya Florida na MD Anderson Cancer Center bwongeye kwerekana ko ikoranabuhanga rya mRNA rikoreshwa mu rukingo rwa COVID-19 rifite ubushobozi burenze ibyo ryatekerezwagaho mu ntangiriro.
INKURU YA TETA Sandra
